《Night of the Dead》由 Jacktostudios 開發，採用第三身視點，係一款開放世界喪屍生存遊戲，支援多人同遊。遊戲本質上同其他求生遊戲一樣，都係被困於一個小島，而島上就滿佈大量喪屍，玩家需要喺島上四處探索，搜集前人留底嘅日誌，搵出線索逃離小島。最重要嘅呢個唔係設定，而係真係可以逃出呢座小島，令到遊戲有一個明確嘅目標。

咁話晒呢隻係喪屍生存遊戲，為咗生存落去所以日頭較安全時就要周圍砍伐樹木、挖掘石頭、拆車去獲得資源，再利用各種素材去建造工作台、武器、裝備等等，呢點同其他求生類喪屍無乜分別。不過喺《Night of the Dead》入面，最重要嘅就係每日入黑前要先建造避難所。避難所可以好似塔防類遊戲咁，起到得一個入口，然後整到迷宮一樣，再喺迷宮入面放置大量固定砲台、噴火裝資、大型齒輪碎肉機等陷阱，勁有「影牢」Feel，玩家可以發揮無限創意「虐殺」喪屍。

《Night of the Dead》沿用其他喪屍遊戲設定，日頭安全夜晚恐怖，而本作夜晚嘅喪屍潮又比起其他遊戲數量更多，當中仲會混入高速移動、厚血、高攻等亞種喪屍。但因為遊戲有一明確目標「逃出島嶼」，所以又唔會死守同一個地方，基本上係會不停移動，所以時間同資源控制就變得非常重要。另外現時版本係並無飢餓值、溫度等設定，但官方說明有列出「通過狩獵和耕種獲得食物，做飯和飲食」，意味住未來嘅更新要兼顧埋飲食。

《Night of the Dead》已經推出搶先體驗，暫時對應平台只有 PC Steam 版本，並獲得極度好評。